حوزہ نیوز ایجنسی کی رپورٹ کے مطابق، ولی فقیہ کے نمائندے اور امام جمعہ اصفہان آیت اللہ سید یوسف طباطبائی نژاد نے سپاہ صاحب الزمان (عج) کے زیر اہتمام نماز کے فروغ کے میدان میں سرگرم افراد کی خدمات کے اعتراف کی تقریب سے خطاب کرتے ہوئے نماز کی اہمیت پر روشنی ڈالی۔ انہوں نے کہا: "نماز تمام اعمال میں سب سے افضل ہے، اور ایمان کے بعد اللہ تعالیٰ نے سب سے زیادہ تاکید نماز پر کی ہے۔"
آیت اللہ طباطبائی نژاد نے اپنے خطاب کا آغاز حضرت فاطمہ زہرا سلام اللہ علیہا کی شہادت کی مناسبت سے تعزیت پیش کرتے ہوئے کیا اور ان کی زندگی کے اہم پہلوؤں کا تذکرہ کیا۔ انہوں نے کہا کہ حضرت زہراؑ نے اپنی شہادت سے قبل امیر المومنینؑ کو نصیحت کی کہ وہ صبر کا دامن تھامے رکھیں اور ہمیں فراموش نہ کریں۔ اس واقعے سے ثابت ہوتا ہے کہ عالم برزخ کا اس دنیا سے تعلق باقی رہتا ہے، اور والدین اپنی اولاد کے اعمال سے آگاہ ہوتے ہیں۔
انہوں نے سورہ بقرہ کی ابتدائی آیات کا حوالہ دیتے ہوئے کہا کہ تقویٰ کی پہلی نشانی غیب پر ایمان ہے، جس میں خدا، امام زمانہ (عج)، اور قیامت پر یقین شامل ہیں۔ اس کے بعد قرآن میں نماز قائم کرنے کی تاکید کی گئی ہے، جس سے معلوم ہوتا ہے کہ عبادات میں نماز کو سب سے زیادہ اہمیت حاصل ہے۔
آیت اللہ طباطبائی نژاد نے وضاحت کی کہ قرآن کریم میں عبادات کی ترتیب ایک خاص حکمت کے تحت بیان کی گئی ہے۔ جہاں بھی نماز اور زکات کا ذکر ہوا ہے، نماز کو ہمیشہ پہلے رکھا گیا ہے۔ اسی طرح اطاعت کے معاملے میں بھی پہلے اللہ کی اطاعت اور پھر والدین کے ساتھ احسان کا ذکر کیا گیا ہے۔
انہوں نے کہا کہ جو افراد گناہوں میں مبتلا ہوتے ہیں، ان سے جب انحراف کی وجہ پوچھی جائے تو اکثر یہ معلوم ہوتا ہے کہ وہ نماز کے پابند نہیں تھے۔ انہوں نے قرآن مجید کی آیت "إِنَّ الصَّلَاةَ تَنْهَیٰ عَنِ الْفَحْشَاءِ وَالْمُنْکَرِ" کا حوالہ دیتے ہوئے کہا کہ نماز انسان کو فحاشی اور برائیوں سے دور رکھتی ہے۔
آیت اللہ طباطبائی نژاد نے کہا کہ مرنے کے بعد انسان کے اعمال کا سلسلہ بند ہو جاتا ہے، سوائے ان کاموں کے جو صدقہ جاریہ ہوں، وہ علم جس سے فائدہ پہنچے، یا ایسی اولاد جو والدین کے حق میں دعا کرے۔
انہوں نے آخر میں نماز کے اجتماعی اثرات کا تذکرہ کرتے ہوئے کہا کہ نماز نہ صرف انفرادی بلکہ معاشرتی زندگی میں بھی انسان کی رہنمائی کرتی ہے۔ یہ انسان کو اللہ کی قربت عطا کرنے کے ساتھ ساتھ اسے برائیوں اور غلط راستوں سے محفوظ رکھتی ہے۔
